USO DAS TIC EN AUDICIÓN E LINGUAXE

As TIC constitúen un elemento máis no proceso de intervención co alumnado que precisa apoio na área da comunicación, linguaxe e fala. Por tanto, o seu uso está relacionado coa avaliación, cos obxectivos, coa selección doutros recursos; dependen en gran parte da metodoloxía e están integradas na secuencia de actividades. A resposta educativa ás necesidades do alumno ou alumna abarca tanto o contexto escolar (centro, aula ordinaria e aula de apoio) como o contexto familiar.

Xunto a isto, consideramos que comunicación, linguaxe e fala non constitúe un ámbito illado, senón que está relacionado co resto de áreas de desenvolvemento e coa maioría de áreas curriculares, existindo por tanto unha estreita relación coas competencias básicas.

Estas son algunhas das razóns para utilizar as TIC:

• Permiten a participación dos ACNEAES en contornas inclusivas.

• Permiten aproveitar a canle visual, unha das fortalezas que posúen a maioría dos nosos alumnos.

• A motivación que neles esperta o uso dos computadores e outros dispositivos móbiles facilita a aprendizaxe e o adestramento de habilidades específicas da nosa área.

• A  versatilidade da tecnoloxía  ofrece a posibilidade de adaptar en función das necesidades de cada alumno, de axustarnos ao que cada un necesita.

• Facilitan o uso de metodoloxías activas e contribúen á personalización da aprendizaxe. Posibilitan a interacción, favorecendo actitudes de axuda e colaboración.

• Contribúen a centrar a atención e ao desenvolvemento da memoria, capacidades básicas en todo proceso de aprendizaxe.

• Achegan a realidade e facilitan a comprensión do abstracto.

• Permiten que o alumno aprenda en calquera momento, en calquera lugar e con calquera dispositivo.

• Fomentan a iniciativa e a autonomía na realización de tarefas.

• Facilitan a selección e organización de recursos, convenientemente catalogados.

• E por último, facilitan o establecer canles de colaboración co resto de profesionais e coa familia.

FONTE: Lucía Fernández Vivancos